पोटावरील चरबी कमी करण्यासाठी व्यायाम

स्थूल मंडळींना 'सिट अप' काढणे शक्य होतेच असे नाही. ओटीपोटाचे स्नायू बळकट करण्यासाठी स्थूल व्यक्ती खालील व्यायाम करू शकतील. पोटावरील चरबी कमी करण्यासाठीही या व्यायामांमुळे काही प्रमाणात फायदा होतो.
व्यायाम १ :
पाठीवर झोपा. पाय गुडघ्यात वाकवून ते जमिनीला समांतर राहतील अशा पद्धतीने वर उचला. या वेळी जमीन आणि मांडय़ा यांच्यातील कोन ९० अंशांपेक्षा कमी राहावा (छायाचित्र क्र. १). अशा अवस्थेत २० आकडे म्हणून होईपर्यंत थांबा. पुन्हा मूळ स्थितीत या. ओटीपोटाचे स्नायू आकुंचन पावल्यासारखे वाटेल.

व्यायाम २ :
 पाठीवर झोपा. मांडी आणि गुडघ्यांच्या खाली एक उशी ठेवून गुडघ्यापासून खालचे पाय थोडे वर उचलून जमिनीला समांतर ठेवा (छायाचित्र क्र. २). या अवस्थेत गुडघ्यांना किंचितसा बाक राहील. पाय वर समांतर ठेवलेल्या अवस्थेत १० आकडे मोजेपर्यंत थांबा. हा व्यायाम साधारणपणे १० वेळा करा.

डॉ. अभिजित जोशी, अस्थिरोगतज्ज्ञ